KA PA (2013 Fathers Day pual a ka ziah, mahse a hun chiah hi ka lo hai pek a. Hahahaha)

I zarah he khawvel eng hi ka hmu ve a, Nun awmzia hi ka zir ve bauh2 a, mahse ka zir thiam hlei thei lo achha chu ani. I lakah hian engmah beisei ka nei lova, ka neih pawh ka ring bawk hek lo, Mite chu an pa ten an harsatna leh buaina an chinfel sak thin a, an mang an lai takin an lo kuangkuah thin asin. Mahse nang zawng chutiangin i ti ve ngai hauh si lo. I thlamuanna thu dawn ve ka chak em em lai pawhin, fapa tuithlar chan ka chang a, he khawvel a ka hunpawimawh em em, kawppui tur tana thutiam ka tiam lai te em kha chuan min awmpui ve la tha tur ania. Mahse, beisei pawh ka beisei bawk lo che a, ka beisei ngai bawk lovang che. I tel loin hei chen hi ka lo sei lian ve ta a, min ngaihsak lek loh chhung hian i tu te pawh an nula tlangval ta, heti em em a mahni fapa te pawh ngaihsak lo chu, i tute pawh hian an ngaihsak bik hauh lo che tih hi lo hria la, i hmel hmuh pawh an thlahlel bawk hek lo.
Mahse KA PA, Engtin pawh awm la Ka Pa ka tih i ngai tho2 bawk si, KA PA kan ti leh ang che, hetiang tak hian min ngaihthah mahla, KA PA i ni miau a, I nupui fanau te ngaihsak lo lek a i duhber bula i awm bo tak char2 avang hian, KA PA i nihna a bo chuang silo.
Mahse e KA PA, kan dem lul lo che, I theihtawp chhuahin bei sateh mah la, i LALPA thu zawng nanga sawhsawn theih a ni lul si lo. Lei lam ngai lovin, hlim takin i LALPA kiangah khan chawl zel mai zawk rawh aw.

21.July.2013 (Sunday)

KA PIAN TIRH ATA A VAWI 1 NAN KA VA COURT VE -Chhawra Khiangte

    Court in min kohna lehkha ka dawng tlat mai, Kan bih thuak a, Convict hming Lalchhanhima tih ka hmu chu ka phu zawk a, kan nu hming an chhut sual ah ka ngai a, ka bing nghal mup mup mai. Engvang nge niang, kan nu hian Ruk a lo ru em niang ? Nge Fun te alo supply, nge ni Bank a lo rawk ? An Department sum a lo eiru emni ? Chiahpuam lamah a lo inrawlh emni zawk ? Mi a kidnap te ani mai em ? Tual te hial a lo that em ni ang ? Ka rilru ah zawhna hlir zawhna hlir mai chu a rawn in pangawzial tup tup mai a. Mahse, ka nupui nun ka ngaihtuah hian, chutiang ti hmel tur awm reng ani silo. Ka rinna pan(derdep) lai ber pawh a, min tawngtai sak a, dawhtheihna tinreng a min chhawmdawltu, Ka nih ang aia tha a kohhran leh khawtlang ah pawh mi ti lang chhuaktu hi chutiang tur chuan hmeh zawma,  rin zawn chi a ni hlawl si lo. Vai deuh ruaiin uluk takin kan bih nawn leh a, LALCHHANHIMA S/O...... Tih ka hmuh chiah chuan ka thaw huai mai. Witness anga kohna a ni mauh mai si a, engnge ka lo witness reng ka hre hauh silo, Court hun chu ka nghak hlel ta em em mai a, kar khat zet chu ka za zek zek mai nia.
    Tichuan hun leh ni te a ral zel a, Vawiin/Tukin Ni 18..07.2013 ni a lo in herchhuah a, dar 7 :30 AM a rik meuh chuan Dar 11:00 a court tur chu ka insiam peih at tawh nia.Court chanchin leh kalphung hre ve lo ta nafam chu, (Film vel a ka hmuhthin mitthla ah a lo lang chuai chuai a) ka chawlhni kawr leh kekawr ka inbel a, ka pheikhawk thulkhung ngei mai chu a tle thei ang berin ka khuih fai a - Darthlalang hmaah vawi engzatnge ka in en pawh ka hre ta lo - Judge hma a han nuih deuh sak dan tur te chu ka thiam ang tawk a mawi a darthlalang hma a ka zir ngial hnu chuan, Ka fanu sikul kal tur thlah kawi turin kan pafa chuan kan chhuak ta hnak hnak a. Kan motor chu a hma ni a ka lo chhuah berh pui anih avangin, Aizawl Court ropui tak pan na tur atan chuan ka va han iai teh lul em !. Mahse ka fanu sikul tlai ka hlau tawh bawk si nen, a bal a bal chuan kan in phur chhuak ta a, St Pauls school atanga ka let chu a lo la hma fir fer hle mai a, Dar 11 nghah nan tiin ka thian leh ka nau duhtak dawr LAWMA ENFIELD lam ka pan chho ta rih a. Ani phiangsen lah chu a a office kawngkhar a lo in kalh bur mai a, ka kik fe pawh chuan rawn hawn a tum si lo..Chu chen chen BETHEL turah ka ngai silo nen, ka office pakhat zawk SOUTHSIDE COMPUTER lamah ka chhuk leh ta rih a, sana ava han kalmuang duh teh reng em. Dar 10:15 a lo ri ta, phur fe in DISTRICT COURT chu ka pan phei ta nal nal a. Dar 10:40 chiah ah chuan ka kal tumna ram chu ka thleng fel at tawh ani.
    AWI AWI AWII...He khawvel ram zauah hian ka mitthla leh a taka ka va dai ram chu a va han inang lo tehlul em !! Kan JUDGE ber office chu te reuh te a lo ni a, Khawi lai nge COURT ber chu ka han tih chuan, a room chhak feet 12 bial vel, a chhung ah a staff te dawhkan nena khat rup mai bawk chu min kawhhmuh ta mai a. Ka mitthla a Court zau reh ruih, fai hnum hlurh mai kha engtik laiin nge lak bo a awm pawh ka hre lo. Dar 11 a tan tur a nih miau avangin a kawta thutthleng sei ah chuan thu a lo nghak rih turin min hril a, ka inreport fel hnu chuan Rorelna ni a lo thleng a rorelna hma a ding tur chuan tan hun nghak in ka thu ta ran mai a. Mi an rawn pung tual tual a, court tur chi hrang hrang : zu in case, zuar case, bail in report etc kan zi ta nuk mai. Ka kal dawn khan ka thiam ang tawk a inchei ka ni bawk a, ka court puite zingah chuan ka langsar ru ta riau mai a. Choak rual zinga thuro tla ve ni mai awm te hian ka inchan deuh rum rum mai. Ngawi rengin ka thu ta a. Handcuff nena an rawn hruai thenkhatte lah chu Chhandamna ka chanhlim a ka hlim aia nasa mah hian an hlim hmel lawi si, an thianten an lo nghak a, kuhva an han in rawlruk an hlim zia te kha aww.. Kei lah kil khatah Midum zinga nei te ber an sawi ang mai in,  Kross a khenbeh tur ang hrim in ka thu ngawi ran mai si.
    Chutihlai chuan ADVOCATE/UKIL/DAN HREMI rual an rawn vei ta suau suau mai, a hmei a pa in an va nalh hlawm si tak em ! Mipa lah an smart, nula ho lah an duhawm. Tun hma ukil  ka lo hmuh thin ho ang an ni ta hauh lo mai le ! Kan nu awm bo rei tawh vang nge ni ? Ka hmu no siah hlom mai a, athen te phei chuan Jeans dum tight em em mai, thisen zam lang pawng tuak thei khawpa mawi ha te pawh an awm, a sexy titu tan chuan chu tluka tight sexy chu a awm dawn bik em ni ? Suit dum hnuaiah Kamis var; Movie vela ka hmuh thin kha a ang ta deuh sawt sawt chuan ka hre ve leh ta a. Chutiang a nula nalh leh hmuh hrehawm lo zet zet chu kan zoram hian danhremi a lo kawl ve fur tawh tih kan hriat meuh chuan, Case neih ve mai te pawh min ti chak dawn dawn alawm maw le !! Hrep tak chuan....
    Awle, Dar 11:00 a ri ta, Zoram tluchhe viau tawh emaw ka lo tih min kuk harh fawktu atan a ni ngei ang kan judge chuan Case hmasa ber a lam ta lauh mai. COURT nge nge hun an vawng dik e.  Hming an rawn lam, an lut zel. Mahse ka hun reng reng a thleng ve thei ta hauh lo mai. Ka hrilh a va hai em ! a tawp ah chuan Judge PA (PA nihmiang ka ti mai a) a lo chhuak a, `Awm in awm toh lo maw ?` a rawn ti ta mai a. Kha leh chen ka lo ur ve a, Kum khat chhung pawh a ka khawih chet zen zen loh thuam nen theihtawp a ulukin ka inchei ve a, darthlalang hma a nuih mawi ka zir zozai te kha a thlawna ral maiah chuan ka phal thei hlawl lo. `Engtizia nge min koh ve loh` ka lo ti a, ka lehkha chu kan pe a. An case khawih hnuhnung ber, police in an rawn hruai tawh chu ko let leh in, `Hei Witness chu a awm reng alawm` an han ti leh hnuhnawh a. Ka va luh meuh chuan kan Judge ber pawh chuan a lo peih tawh loh hmel kher mai. Mahse engmah a sawi chhuak lem lova. Min koh ve chhan chu kan zawt ta a, APRIL thla lama kan Gas Cylinder bo FIR ka thehluh kha lo ni in, WITNESS atan Police station lam khan ka hming angin an lo sign ni ngei tur ani, Hei hi i signature a ni em, an han tih chuan a lo ni ikhaw lo mai a, `FIR ka theh luh bak engmah thuziak leh sign ka neih loh thu ka hrilh a, ka FIR thehluh a ka hming sign an han en chuan, a lo inanglo nasa mai si. Tihngaihna tak an hre ta bik lo a, Kan Judge ber chuan ` A WITNESS theih zawng chu `A BO NGEI A NI  tih zawng anih ber mai chu a` a ti ta ngawt a. Tichuan ka FIR Statement ngai ang bawk chu Court Witness statement atan kan ziak tha leh ta ringawt a. Kan gas bur rutu ni ngeia an ngaih Gas ruk ching an man chu ka hriat mi anih leh nih loh min zawt leh a, kei lah rukru hmelhriat ngah lem lo mi tak ka lo ni si nen,  `Hepa hi i gas rutu anih leh nih loh pawh chu i hre chuang lo a maw ?` an tih chuan `Ka hre ngailo hrim hrim hepa hi em ni a rutu chu` ka ti let he haw a. `I gas chu i hmulet lo maw ?` tih chu, `la hmu let nang` tiin ka chhang leh mai a.Tichuan, kan dan thiamte chuan ka statement thar siamah chuan hming min ziah tir nawk nawk a. `Ka pu, i lo kal a, kan lawm hle mai, ti khan a tawk, engmah a ngai tawh love` min ti sam ta et a.
    Nalh taka incheia va kal kha a nia, kan inkawmna chu a ho ang reng ka ti hle mai a. HLAWHTLINNA erawh neilo hlom tawp ka ni bik lo, hengte hi ka ngaihtuah zui ta :-
1. Mizo te hian Court leh Dan lam hrim hrim hi hriat chian deuh kan va mamawh em !
2. Kan dan hre mite hi an lo va changkan hmel tawh veng vawng em, (he tih rual hian mipa ho hi zu in thin hmel erawh an pu tlangpui hlom) kan tleirawl ve deuh lai te kha chuan ukil te chu zu rim nam deuh ther ther reng leh tawp hnik hnek kha kan hmuh tam ber an ni mai a, tunah chuan nupui pasal zawng tur pawn court chhehvel a thut tawp mai pawh a iai awm toh loh hi.
3. Zoram hi a chhiatna kan sawi nasa a, sawrkar hnathawk zelthel zia kan sawi nasa bawk si, mahse kan lo chhe vek hlei nem mawle.
4. Zoram District pui ber hi a awmna a tawt em em bak ah hei aia lian leh zau deuh a hmun nuam leh felfai siamsak an va tha em !
5. Hetiang hian kohna dawng lo ila chu, Kan Zoram Danhremi zahawm tak tak te khan, eng-tik-khaw-tik ah mah hian kei ve teh lul hi, KA PU tiin lawmthu min hrilh lek lovang. Chuvang chuan ka hlawhchham hulhual hlei nem mawle.ti chungin Ka tlai rawngbawl hmabak hlen turin kan in lam pan chuan ka in khalh haw ta hna hna a